தொன்மையான மொழிகளில் ஒன்றான நமது தமிழ்மொழி தற்போது கையடக்க கணினிகளிலும், செல்பேசிகளிலும் பயன்படுத்தப்பட்டு வருகிறது.

"கல்தோன்றி மண் தோன்றாக் காலத்தே முன் தோன்றிய மூத்த மொழி" என்ற பெருமைப் பெற்ற தமிழ் மொழி, நவீன காலத்தோடு ஒன்றிணைந்து இணையதளங்களில் பெருமளவில் பயன்படுத்தப்பட்டு வருகிறது.

செல்போன்களில் இணையதளங்களை பார்ப்போரின் எண்ணிக்கை பெருமளவு அதிகரித்துள்ள இந்த சூழலில் டேப்லட் என்றழைக்கப்படும் கையடக்க கணினிகளிலும், ஆன்டிராய்டு, விண்டோஸ், ஆப்பிள் ஐஓஎஸ் ஆகிய இயங்குதளங்களைக் கொண்ட செல்போன்களிலும் தமிழில் தட்டச்சு செய்ய வேண்டும் என்ற கனவு தற்போது நிறைவேறியிருக்கிறது.

ஏற்கனவே ஆன்டிராய்டு, விண்டோஸ் ஆகிய இயங்குதளங்கள் மட்டுமே தமிழில் தட்டச்சு செய்யும் வசதியை அளித்து வந்தாலும் கூட வெளிநாடுகளில் பெருமளவு பயன்படுத்தப்படும் ஆப்பிள் ஐபோன் மற்றும் ப்ளாக்பெர்ரி செல்பேசிகளில் இந்த வசதி கிடைக்காமல் இருந்தது.

உலகின் பல்வேறு நாடுகளில் வாழும் தமிழர்களை கவரும் நோக்கில், தனது புதிய பதிப்பான "ஐ போன் - 5எஸ்"-ல் தமிழில் தட்டச்சு செய்யும் வசதியை ஆப்பிள் நிறுவனம் அறிமுகப்படுத்தியுள்ளது.

ஆப்பி்ள் ஐபோனிற்கான தமிழ் விசைப்பலகையை வடிவமைத்துள்ளவர் மலேசிய வாழ் தமிழரான முத்து நெடுமாறன். ஐ போனின் புதிய இயங்குதளத்துடன் இணைந்தே தமிழ் விசைப்பலகை வெளியிடப்பட்டுள்ளதால் இதற்கென தனியாக அப்ளிகேஷன்ஸ் எனப்படும், செயலிகளை இனி பதிவிறக்கம் செய்யத்தேவையில்லை. இதன்மூலம், இணையதளத்தேடல், எண்களை பதிவு செய்துகொள்ளுதல், என அனைத்து பயன்பாடுகளுக்கும் இனி தமிழ் மொழியை பயன்படுத்தலாம்.

மேலும் மின்னஞ்சல், குறுஞ்செய்தி ஆகியவற்றை தமிழிலேயே அனுப்ப முடிவதோடு, சமூக வலைத்தளங்களான ஃபேஸ்புக், டிவிட்டர் ஆகியவற்றிலும் இனி தமிழில் சுலபமாக எழுத முடியும். செல்போன் விற்பனைச் சந்தையில்ஆப்பிள் நிறுவனத்தைப்போல மற்றொரு பிரபல நிறுவனமான பிளாக்பெர்ரி நிறுவனமும் தனது அடுத்த அறிமுகமான 10 வது பதிப்பில் தமிழில் தட்டச்சு செய்யும் வசதியை அறிமுகப்படுத்த உள்ளது.